Быйыл Ысык-Көлдө ички туризм жанданып, өзүбүздүн жарандар эс алууга көп келет деп күтүп жатабыз. Мындай пикирин өкмөттүн Ысык-Көл облусундагы өкүлү Акылбек Осмоналиев брифинг учурунда билдирди.
Анын айтымында, Ысык-Көлдөгү туристтик сезон, туристтерди кабыл алуу талаптары боюнча атайын долбоор иштелип чыккан. Ал Маданият, маалымат жана туризм министрлигинин алдындагы Туризм департаментинин кароосуна жөнөтүлдү.
"Департамент карап чыккандан кийин долбоорду Саламаттык сактоо министрлигине жөнөтөбүз. Алардын жактыруусун алган соң туризм тармагы түрлөрүнө жараша ачыла баштайт. Туристтерди кабыл алчу мекемелердин даярдыгы жылдагыдан жакшы. Анткени талаптар күчтүү. Саламаттык сактоо министрлигинин алгоритмине ылайык, бардык даярдык көрүлүп жатат. Быйыл ички туризм жанданып, өзүбүздүн жарандар эс алууга көп келет деп үмүттөнүп жатабыз", — деди Осмоналиев.
Кыргызстанда коронавирус жуктуруп алгандардын саны кескин өсүп, бир суткада 74 адамдан вирус табылды. Муну менен жуктургандардын саны 1594кө жетти. Коронавирустан 1066 бейтап айыгып чыгып, тилекке каршы, 16 адам көз жумду.
11-майдан тарта айрым аймактардагы өзгөчө абал режими алынып, ал эми өлкө боюнча киргизилген өзгөчө кырдаалдын мөөнөтү узартылды. Бишкек, Ош шаарларында, Ат-Башы районунда жана Чаткал районунун Каныш-Кыя айыл аймагында карантин жарыяланды. Бул жергиликтүү бийликке кырдаалга жараша чектөөлөрдү киргизүүгө укук берет.
Өлкөдөгү абал тууралуу Sputnik Кыргызстан тексттик баяндама жүргүзүүдө.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.
