Эне жана баланы коргоо улуттук борборунун гематология бөлүмүндө жаткан бейтап балдардан, аларды караган энелерден жана медиктерден коронавирус аныкталды. Бул тууралуу Sputnik Кыргызстан агенттигине аталган борбордун жетекчиси Камчыбек Узакбаев кабарлады.
Анын айтымында, марттын аягында алардын ооруканага Жалал-Абад облусунан бейтап түшкөн. Энеси карап жаткан баланын дарылануусу 17-апрелде аяктап, кайра Жалал-Абадга кетишкен.
"Бейтаптын апасынан коронавирус бир жумадан кийин Жалал-Абадга кирип бараткандагы блокпосттон аныкталыптыр. Баладан эмес, коронавирус апасынан чыккан. Бизге маалымат түшөрү менен 30-апрелде алар менен байланышта болгон медик, бейтап жана алардын апаларынан анализ алынды. Жыйынтыгында алардын жанында жаткан эки бейтап баладан, аларды караган үч энеден жана бир дарыгерден, бир кичи медперсоналдан коронавирус аныкталды", — деди Узакбаев.
Ал эми бөлүмдөгү калган 20 медкызматкердин, 13 бала жана жети эненин анализдери таза чыкканы маалым болду. Коронавирус аныкталган бейтаптардын бардыгы жугуштуу илдеттер ооруканасына которулган.
"Вирус табылган эки баланын бири 15 жашта болсо, экинчиси тогузда", — деди Узакбаев.
Саламаттык сактоо министрлигинин маалымат кызматы кабарлагандай, бул бөлүмдө жаткан 13 бала тең оор абалда болгондуктан, дезинфекция иштери жүрүп, балдар ооруканада эле калышкан. Ал эми 20 медкызматкерге биринчи жана экинчи кабатка обсервация уюштурулган.
