Өзгөчө абал режими 11-майда токтотулгандан кийин дагы Бишкекке тийиштүү чектөөлөрдү киргизүү маселеси каралууда. Бул туурасында борбор калаанын вице-мэри Татьяна Кузнецова брифинг учурунда билдирди.
Анын айтымында, шаарга келе жаткандардан өткөрмө кагаздын, экспресс-тесттин же ПЦР-анализинин жыйынтыгы тууралуу маалым кат талап кылынышы мүмкүн.
"Мэрия Шаардык ички иштер башкармалыгы менен биргеликте жөө адамдардын жана автоунаалардын каттамын чектөө максатында ички санитардык постторду коюу маселесин карап жатат. Ошондой эле анализдеп чыгып, жаңы конуштардагы карантиндик чараларды күчөтүүгө өтөт. Райондук администрациялар санитардык постторду коюп, ооруну жуктургандар жана байланышта болгондор жашаган аймактардын баарын текшерет. Бейтаптар менен байланышкан адамдарды издөө чаралары күчөтүлөт", — деди Кузнецова.
Коронавирустун кесепети
Кыргызстанда коронавируска кабылгандардын саны 830га жетип, анын ичинен 575и айыгып чыкты. Тилекке каршы, 10 бейтап каза болуп калды.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Sputnik редакциясы карантин учурунда ар тараптан жардам бере турган кызматтардын ишеним телефондорун жана облустардагы комендатура, штабдардын номерлерин жарыялаган.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.
