Ысык-Көлдө коронавирус жуктурганы аныкталган эки киши Индияга дааватка барып келген Түп районунун жашоочулары экенин жергиликтүү бийлик органдарынан билдиришти.
Маалыматка ылайык, алар Кыргызстанга Дели — Бишкек авиакаттамы менен 22-мартта келишкен. Бирөө 35, экинчиси 39 жашта.
Аэропорттон аларды текшерип, үч күн обсервацияга жаткырышкан. Анализдери таза чыккандыктан 24-март күнү үйүнө кетүүгө уруксат берилген.
Жарандар ошол эле күнү 15 адам менен бир маршруткада Балыкчы шаарына чейин барган. Себеби маршруткадагы жүргүнчүлөрдүн Ысык-Көлдө каттоосу жок болгондуктан ал жердеги санитардык-карантиндик посттон артка кайтарылган. Мындан улам алар андан ары Түп районуна такси менен кетишкен. Ошентип Делиден келген эки киши түнкү саат 3.00дө үйүнө жеткен.
Эртең менен жергиликтүү фельдшерлер алардын үйүнө барып саламаттыгын текшерип, шектүү симптомдор тууралуу районго кабарлаган. Мындан улам экөө тең кайра обсервацияга жаткырылып, кайрадан анализ тапшырганда коронавирус жуктурганы аныкталган.
Учурда бирөөнүн беш, экинчисинин жети үй-бүлө мүчөсү обсервацияга жаткырылды. Ошондой эле таксист дагы үй-бүлөсү менен карантинге алынды.
Ал эми маршрутканын мамлекеттик номери жана айдоочусунун аты-жөнү Республикалык штабга жөнөтүлгөн.
Коронавирус Кыргызстанда
Кыргызстанда коронавируска кабылгандардын саны 107ге жетти. Алардын 49у эркек, 58и аял. Ал эми кечээ Сузактын үч тургуну айыгып чыкканы кабарланган.
Бишкек, Ош, Жалал-Абад шаарларында жана Сузак, Ноокат, Кара-Суу райондорунда өзгөчө абал жарыяланган. Кечки саат 20.00дөн таңкы 7.00гө чейин коменданттык саат киргизилди. Мындай режим 15-апрелге чейин созулат.
Ушу тапта өлкө ичинде абал кандай болуп жатканын Sputnik Кыргызстан жүргүзгөн тексттик баяндамадан билүүгө болот.
