Президент Сооронбай Жээнбеков Коопсуздук кеңешинин жыйынында саламаттык сактоо министри Космосбек Чолпонбаевге каарын төктү. Бул тууралуу мамлекет башчынын маалымат кызматы билдирди.
Жээнбеков өлкөдө коронавирус жуктургандардын санынын өсүшү алдын алуу иштеринин чабал жүрүп жатканын айгинелеп койгонун баса белгилеген.
Президент Республикалык штаб жана Саламаттык сактоо министрлиги илдеттин жайылышын шарттап, жугузуп алгандар менен байланышта болгон адамдардын тобун өз маалында аныктабагандыгын сынга алды.
"Коопсуздук кеңеши бул маселе боюнча төрт жолу жыйынга чогулду. Иштин негизги багыттары так аныкталган. Жыйынтыгында Коопсуздук кеңешинин чечимдери ишке ашпай калганын көрүп жатабыз", — деди Жээнбеков.
Ошондой эле президент лабораториялык изилдөөлөрдү өткөрүүгө өз маалында даярдык болбогондугу, медициналык техникалар менен жабдылбагандыгы жана тестирлөөгө керектөөчү материалдардын запасы жетишсиз болгону үчүн Саламаттык сактоо министрлигинин ишмердүүлүгүн өзүнчө сынга алды.
Ошондой эле мамлекет башчы медиктердин жеке коргонуусу үчүн зарыл болгон каражаттар, бүгүнкүдөй шартта алардын күнүмдүк иши үчүн зарыл болгон транспорт жана башка керектүү каражаттар менен камсыздалбаганы үчүн да урушкан.
"Январда сиз биздин лабораториялар даяр деп маалымат бердиңиз эле. Чындыгында андай эмес экен. Тестирлөө реагенттери жетишсиз болуп чыкты. Министрлик өз убагында ыкчам чараларды көрүүсү зарыл болчу", — деп белгиледи Жээнбеков саламаттык сактоо министрине кайрылып.
Президент Сооронбай Жээнбеков комендатуралардын ишмердигине карата жарандардын нааразычылыгы болуп жатканын, анын ичинде атайын өткөрүү баракчаларын (пропуск) берүү, блокпостторду атайын жабдыктар менен жабдуу, блокпосттордо турган кызматкерлердин коопсуздугун камсыздоо маселелерин эске салды.
Ошондой эле өлкөнүн өткөрмө пункттарындагы карантин-санитардык постторунун ишмердигине, келип жаткан жарандарды текшерүү боюнча иш жетишсиз уюшулганына көңүл бурду.
Коопсуздук кеңешинин кезектеги жыйынынын жыйынтыгы боюнча өкмөткө бир катар сунуштар киргизилди.
Ошондой эле Коопсуздук кеңеши тарабынан премьер-министрге өлкө аймагына коронавирус инфекциясынын киришин алдын алуу боюнча жетишсиз иштери үчүн өкмөттүн айрым мүчөлөрүнө чара көрүү сунушу киргизилди.
Коронавирус Кыргызстанда
Кыргызстанда коронавируска кабылгандардын саны 107ге жетти. Алардын 49у эркектер, 58и аял. Ал эми кечээ Сузактын үч тургуну айыгып чыкканы кабарланган.
Бишкек, Ош, Жалал-Абад шаарларында жана Сузак, Ноокат, Кара-Суу райондорунда өзгөчө абал жарыяланган. Кечки саат 20.00дөн таңкы 7.00гө чейин коменданттык саат киргизилди. Мындай режим 15-апрелге чейин созулат.
Ушу тапта өлкө ичинде абал кандай болуп жатканын Sputnik Кыргызстан жүргүзгөн тексттик баяндамадан билүүгө болот.
