Өкмөт өзгөчө абал учурунда көчөгө чыкканда көрсөтө турчу маршруттук баракча деген эмне экенин түшүндүрүп берди.
Өлкөдө коронавирустун жайылып кетпешине бөгөт коюу максатында Бишкек, Ош жана Жалал-Абад шаарларына, ошондой эле үч районго өзгөчө абал режими киргизилди. Бул режим 15-апрелге чейин күчүндө болот. Мурдагыдай күндүз баары каалаган жагына бара албайт, ары-бери жүрүүгө чектөө коюлду.
Буга чейин биринчи вице-премьер Кубатбек Боронов өзгөчө абал киргизилген аймакта жашагандар кечки саат 20:00дөн таңкы 7:00гө чейин эч кайда чыкпашы керек экенин эскерткен. Анткени бул убакта коменданттык саат жарыяланган. Күндүз дарыканага, азык-түлүк дүкөнүнө жана ооруканага гана чыкса болот.
Эгер көчөгө ушул үч нерсе үчүн чыга турган болсо, жарандын жанында өздүгүн тастыктаган документ жана маршруттук баракча болушу керек.
Маршруттук баракча — бул жаран өз колу менен толтурган анкета.
Анда төмөнкү маалыматтар жазылышы шарт:
аты-жөнү;
телефон номери;
үйдөн чыккан себеби;
канча убакытта үйүнө барары;
жашаган жери;
бара турган жеринин дареги.
Эскерте кетсек, ушу тапта Кыргызстанда коронавирус жуктуруп алгандардын саны жалпы жонунан 42 кишиге жетти. Ооруканада жаткандардын арасында бир жашка чейинки бир ымыркай, 6 жаштагы бир жеткинчек жана 14 жаштагы өспүрүм бар. Ал эми Сузактын 71 жаштагы тургуну жандандыруу бөлүмүндө жатат.
Редакция өлкөдөгү кырдаал боюнча тексттик трансляция жүргүзүп жатат.
