Эртеңден тарта Кыргызстандын бир катар шаар, облустарына өзгөчө абал киргизилет. Бул тууралуу президенттин маалымат кызматы кабарлады.
Билдирмеге ылайык, өлкө башчы Сооронбай Жээнбеков ЖК төрагасы Дастан Жумабеков, премьер-министр Мухаммедкалый Абылгазиев жана Жогорку соттун төрайымы Гүлбара Калиева менен жолугушкан.
Анда өлкөдө коронавирустун жайылып жатышы тууралуу сөз болгон. Мындан улам Бишкек, Ош жана Жалал-Абад шаарларына, Ош облусунун Ноокат, Кара-Суу райондоруна, ошондой эле Жалал-Абад облусунун Сузак районуна өзгөчө абал киргизүү тууралуу чечим кабыл алынды.
Президент тийиштүү жарлыктарга кол коюлуп Жогорку Кеңешке жөнөтүлгөнүн кабарлады.
Аталган шаарларда өзгөчө абал 25-марттан тарта 15-апрелге чейин киргизилмекчи.
Бул убакыттан тарта көрсөтүлгөн шаар, райондордо комендатура уюштурулат.
Президент санитардык-карантиндик посттон өтөрдө азык-түлүк ташыган жүк ташуучу унааларга маани берүү керектигин баса белгилеген.
