Каргаша 25-декабрь күнү Бишкектеги Байтик баатыр менен Кулатов көчөлөрүнүн кесилишиндеги жол жээкте болгон.
Бишкек шаардык милициясы эл ташыган маршрутканын алдында калып каза болгон аялдын иши боюнча экспертизанын жыйынтыгын күтүп жатат. Бул туурасында ШИИБдин маалымат кызматы билдирди.
Каргаша өткөн жылдын 25-декабрь күнү Бишкектеги Байтик баатыр менен Кулатов көчөлөрүнүн кесилишинде болгон. Күбө жөнөткөн видеодон аял маршруткадан түшүп жатып, тайгаланып кулаганын көрүүгө болот. Дал ошол маалда дароо жүрүп кеткен маршруткага урунган.
Аталган факты Кылмыштардын жана жоруктардын бирдиктүү реестрине катталган.
Учурда тиешелүү соттук-медициналык экспертиза жүрүп жатат. Жазык кодексинин 297-беренеси ("Автотранспорт каражаттарынын кыймылы жана эксплуатациялоо коопсуздук эрежелерин бузуу") менен сотко чейинки өндүрүш иши ачылган. Маршрутканын айдоочусу кармалган эмес.
