Ноокатта милиция кызматкерлери самсы бышырган тандырдын ичинде күйүп жаткан кишини сактап калышты. Бул туурасында Ош облустук ички иштер башкармалыгынын маалымат кызматынан билдиришти.
Окуя 28-декабарга караган түнү саат 1:15те болгон. Анда түнкү рейдге чыккан милиционерлер көчөдөгү самсы жапкан тандырдын ичи түтөп жатканын байкап калышкан.
"Шек санаган кызматкерлер тандырдын ичин карашканда ичинде эс-учун жоготкон кишини жана анын кийимдери күйүп баштаганын көрүшкөн. Милиция кызматкерлери аны сыртка алып чыгып, алгачкы медициналык жардам көрсөтүшкөн. Учурда жаран Ноокат райондук ооруканасында дарыланып жатат", — деп айтылат маалыматта.
Эркек киши милицияга сыртта катуу суук болуп үшүгөндүктөн тандырдын ичине кирип алганын айтып берген. Бирок чогу өчпөгөндүктөн ал кишинин түтүнгө ууланып эс-учун жоготуп койгондугу, анын кесепетинен кийими күйгөнү кошумчаланды.
Аман калган адам Баткен облусунун Кадамжай районунун 1982-жылы туулган А.А. аттуу тургуну экендиги аныкталган.
Маалыматта түнкү рейд Ош облусунун бардык райондорунда жума сайын жүргүзүлүп турары айтылат.
