23 декабря 2019
Бишкек шаарынын мурдагы мэри Албек Ибраимов 15 жылга эркинен ажыратылды. Бул туурасында Sputnik Кыргызстандын кабарчысы жеринен билдирди.
Жараян Ленин райондук сотунда өтүп, өкүмдү судья Бакыт Сагынбаев чыгарды.
Мамлекеттик айыптоочулар сотко Ибраимовдун мүлкүн конфискациялоо менен 20 жылга кесип, мамлекеттик кызматтарда үч жылга чейин иштебей тургандай кылууну сунуштаган.
Албек Ибраимовго карата Кылмыш-жаза кодексинин 171-беренеси ("Ишенип берилген мүлктү ыйгарып алуу же төлөмөр болуу"), борбор калаадагы жер тилкелерин бөлүштүрүүдөгү коррупция фактысы боюнча кылмыш иши козголгон. УКМКнын маалыматына ылайык, Ибраимов мэр болуп турганда жеке тараптарга жер берүү боюнча коррупциялык схема түзгөн. Ал 2018-жылдын 19-июлунан бери камакта отурган.
