Президенттин маалымат кызматынын жетекчиси Толгонай Стамалиева Кыргызстандагы бир катар ЖМКлар менен журналист Али Токтакуновдун банктагы эсебинин камакка алынышы боюнча билдирүү таратты.
Эске салсак, Матраимовдордун үй-бүлөсү "Азаттык" радиосу, "Клооп" басылмасы жана "24kg" маалымат агенттигинен, ошондой эле журналист Али Токтакуновдон моралдык чыгым өндүрүп берүүнү суранып сотко кайрылган. Арызды караган сот журналист менен ЖМКлардын эсебиндеги каражатты камакка алуу чечимин чыгарган.
"Президент Сооронбай Жээнбеков сөз эркиндиги менен күчтүү жарандык коомду ар дайым колдоп келери баарына белгилүү. Мамлекет башчы муну ата мекендик жана чет элдик журналисттерге берген интервьюларында дагы айтып келген. Жээнбеков так ушул факторлор Кыргызстандын өнүгүшүнө таасир этет деген оюнан кайтпайт", — деди Стамалиева.
Маалымат катчы белгилегендей, бул учурда президенттин ар бир кадамы коомчулук тарабынан соттук процесске басым жасап жаткандай кабыл алынышы мүмкүн.
"Соттук териштирүүлөрдүн бардыгы укуктук талаада жүрүшү керек. Ошого карабастан бул факты ар дайым сөз эркиндигинин принциптерин карманып келген Кыргызстандын президентинин гана эмес, биздин демократиялык өлкөнүн аброюна да шек келтирерин так кесе билдиребиз", — деди Стамалиева.
Окуянын чоо-жайы
2019-жылдын ноябрь айынын аягында Кытайдан ташылган аткезчилик боюнча бир нече ЖМКнын биргелешкен иликтөөсү жарыяланган. Анда бир тууган Матраимовдор, атап айтканда, Бажы кызматынын төрагасынын мурдагы орун басары Райым Матраимовдун ишкер Хабибула Абдукадыр менен иш кылганы баяндалат. Материал 10-ноябрда Стамбулда өлтүрүлгөн ишкер Айэркен Саймаитинин көрсөтмөлөрүнө негизделген. Саймаити бир нече жыл ичинде Кыргызстандан 700 миллион доллардан ашык каражатты чыгарып кеткенин айтып берген. Ишкер өлөр алдында журналисттерге коррупциялык схемалар тууралуу билдирип, аларды далилдей турчу документтердин көбүн берип, айрымына үлгүрбөй калган.
25-ноябрда Бишкек менен Каракол шаарында коррупцияга каршы митинг өтүп, уюштуруучулар Райым Матраимовдун кармалышын талап кылышкан.
