Кыз кечээ, 8-майда, саат 14.30да машыгууга кеткен бойдон дайынсыз болуп жаткан.
Борбор калаада дайынсыз жоголгон 14 жаштагы Элиза Максытова табылды. Бул туурасында Sputnik Кыргызстан агенттигине Бишкек ШИИБдин маалымат кызматы кабарлады.
Максытова 8-майда, саат 14.30да адаттагыдай эле көркөм гимнастика менен машыгуу үчүн "Орто-Сай" базары жакка кеткен бойдон кабарын билдирген эмес.
Милиция кызматкерлери Элизаны 6-кичи райондон аман-эсен таап, ата-энесине өткөрүп беришти.
Ал эми кыздын апасы аны бүгүн таңкы саат 6.00дө табышканын билдирди.
"Кызым азыр уктап жатат. Эмнеге кабарын билдирбей кеткенин ойгонгондон кийин сурап, тактайбыз. Өткөөл куракта болгондуктан, ушундай кадамга барды окшойт деп ойлоп жатабыз", — деди апасы.
Элиза Максытова көркөм гимнастика менен алектенип, сынактарга катышып жүрөт.
