Ысык-Көлдүн Балыкчы жана Тоң райондорунда сел жүрүп, жолдор бузулганын ӨКМ билдирди.
Бүгүн, 30-июль күнү, таңкы саат 04:30 чамасында Балыкчы шаары менен Тоң районунун Кескен-Бел ашуусунда, Кара-Талаа жана Оттук айылдарында нөшөрдөн кийин сел жүргөн.
"Суу турак үйлөрдү каптап, ички чарбалык жолдор менен арыктар кум-шагылдарга толгон. Ысык-Көлдүн түштүк жагындагы трассанын 35-чакырымында жолдун айрым жерлери селден зыян тарткан. Ал эми Көлдүн түндүк жагынан кеткен жол ачык", — деп айтылат маалыматта.
Абалды жеринен көзөмөлдөө үчүн ӨКМ министри Бообек Ажикеев менен министрликтин Ысык-Көл облусундагы башкармалыгынын башчысы Замирбек Жумагазиев чыгып кеткен.
Учурда Балыкчыдан барган 15 куткаруучу эки атайын техника менен тазалоо иштерин жүргүзүп жатат.
Жабыркагандар катталган эмес.
